|
|
|
|
पशु मर्दा किसानलाई आर्थिक रूपमा हुने ठूलो क्षति कम गर्न र पुनः पशुपालनमा प्रेरित गर्ने उद्देश्यले सरकारले ल्याएको पशु बिमा कार्यक्रम अन्तरगत रोल्पामा पनि गत मंसिरदेखी सुरु भएको हो । रोल्पामा नेशनल इन्स्योरेन्स कम्पनीले पशुबिमा गर्ने जिम्मा पाएको छ । नेशनल इन्स्यारेन्स रोल्पाका प्रमुख जनक वलीका अनुसार कम्पनीले गत मंसिरदेखी जिल्लामा पशुबिमा गर्ने काम सुरु गरेको थियो ।
पशु बिमा कार्यक्रम लागू भएपछि हालसम्म रोल्पामा १ हजार २ जना किसानले पशुबिमा गराएका छन् । बिमा गराउनेहरु धेरैजसो लिबाङ, ह्वामा, जिनाबाङ, कुरेली, मिरुल, इरिबाङ, घर्तीगाउँ, जैमाकसला लगायतका किसानहरु रहेका छन् । पशु बिमाका बारे किसानहरूलाई जानकारी नहुनु र भौगोलिक बिकटताका कारणले पशु बिमा गर्ने किसान थोरै संख्यामा मात्र भएका हुन् ।
रोल्पामा एक हजार २ वटा पशुको बिमा गरिएको छ । बिमा गराएका पशुहरूमध्ये बाख्रा ९ सय २२, गाई २४, भैसी १६, भेडा ३, बङ्गुर ८, गोरु १६ र राँगा १३ वटा रहेका छन् । अपेक्षाभन्दा कमै किसानले मात्र पशुबिमा गराएको उनले बताए । भौगोलिक बिकटता र प्रचारको कमी लगायतका कारणले अपेक्षाभन्दा कमै किसानले बिमा गराएका उनको भनाई छ ।
उनका अनुसार बिमा गरिएकामध्ये ६ वटा पशु मरेका थिए । ६ वटा मरेकामा सबै बाख्रा रहेका छन् । यसबापत कम्पनीले क्षतिपूर्ति रकम उपलब्ध गराएको छ । मरेका सबै पशुको बिमा कम्पनीले भुक्तानी दिएपछि किसानहरूमा बिमाप्रति केही आकर्षण बढेको वलीले बताए । रोल्पाका अधिकांश मानिस कृषि पेसामा संग्लन छन् । धेरैजसोले भेडाबाख्रा पाल्दै आएका छन् । तुलसीपुर अनलाइनबाट
Post a Comment