|
|
|
|
प्यूठान ६-वैशाख । नव प्रतिभाहरुको खोजी गर्ने उद्देश्यले जिल्लामा संचालन गरिएको ‘प्यूठानी तारा सिजन–३’ बाट सवै विधामा प्यूठानकै प्रतिभा तारा बनेका छन् ।
गायनतर्फ चिराग मगर, नृत्यतर्फ पकला–२ की मालिका मल्ल र साहित्य पर्यटनतर्फ तुषारा हिडडाँडाका एकराज पोख्रेल(कुखुरी काँ) ‘तारा’ घोषणा भएका हुन् । झण्डै तीन सय बढी प्रतिस्पर्धीहरुको विचमा उनीहरु यसवर्षको तारा छनोटमा परेको आयोजकले जनाएको छ ।
८० प्रतिशत एसएमएस ‘भोटिङ’ र २० प्रतिशत मूल्यांकनको आधारमा तारा घोषणा गरिएको मूल आयोजक समितिका संयोजक एवं रेडियो लिस्ने आवाजका स्टेशन म्यानेजर नोमराज पौडेलले जानकारी दिए । स्वर्गद्धारी बहुमुखी क्याम्पस विजुवार पूण्यखोलामा शनिवार आयोजना गरिएको घोषणा कार्यक्रममा गायन र नृत्यतर्फका तारालाई नगद ५०-५० हजार र पर्यटन साहित्यतर्फका तारालाई नगद दश हजार सहित मेडल, प्रमाणपत्र र विभिन्न गिफटहरु प्रदान गरिएको छ ।
एकै मंचबाट तीनै वटा विधाका तारा छनौट गर्ने संभवत मुलुककै पहिलो कार्यक्रम रहेको आयोजकले दावी गरेको छ । ‘नियमित कलाकारहरुको खोजी र व्यवसायिकरणका लागि वर्षेनी प्यूठानी तारा संचालन गर्दै आएका छौँ’,पौडेलले भने,‘जिल्लाको पर्यटन प्रवद्र्धन गर्ने उद्देश्यले यसपटक पर्यटन साहित्य तारा समेत थपेका हौँ ।’ सवै विधाका तारा र ‘टप फाईप’ सम्म छानिएका प्रतिभाहरुलाई विभिन्न संघ संस्था, व्यवसायिक फर्महरुले नगद पुरस्कार र गिफ्टहरुको प्रायोजन गरेको आयोजकले जनाएको छ ।
रेडियो लिस्ने आवाजको आयोजना, स्वर्गद्धारी टेलिभिजन, लिस्ने जनसंचार साप्ताहिक र प्राणरक्षा मासिकको सह–आयोजनामा विगत तीन महिनादेखि प्यूठानी तारा संचालन गरिएको हो । घोषणा भएका सवै प्यूठानी ताराहरुको कलालाई थप व्यवसायिकरण र प्रवद्र्धन गर्नका थप सहयोग गरिने स्वर्गद्धारी टेलिभिजनका प्रवन्धक विनोद भण्डारीले बताएका छन् ।
‘कला-संस्कृतिलाई विकासमा जोडौँ’ घोषणा कार्यक्रममा बोल्दै प्रमुख अतिथी सामान्य प्रशासन मन्त्री रेखा शर्माले कला र संस्कृतिलाई विकास निर्माणमा जोड्नुपर्ने बताएकी छिन् । पर्यटकिय हिसावले प्यूठानमा थुपै्र संभावना भएकाले यसको प्रवद्र्धनमा कला क्षेत्रको भूमिका महत्वपूर्ण हुनेमा उनले जोड दिईन । ‘विकासको प्रमुख आधार भनेको पर्यटन हो’,उनले भनिन्,‘यहाँको कला, साहित्य र पर्यटन क्षेत्रको विकासमा म सदैव प्रतिवद्ध छुँ ।’
तारालाई वर्षभरी यात्रामा छुट यसैविच, ‘प्यूठानी तारा सिजन–३’बाट छनौट भएका ताराहरुलाई वर्षभरी यात्रा गर्दा निःशुल्क व्यवस्था गरिएको छ । स्वर्गद्धारी सार्वजनिक यातायात व्यवसायी समिति विजुवार प्यूठानले चिराग मगर(गायन), मालिका मल्ल(नृत्य) र एकराज पोख्रेल(पर्यटन साहित्य)लाई समितिद्धारा संचालित यातायातका साधनहरुमा यात्रा गर्दा निःशुल्क व्यवस्था गरिएको समितिका महासचिव चन्द्रमान श्रेष्ठले जानकारी गराए ।
‘नव प्रतिभाहरुको सम्मान गर्नका लागि यस्तो व्यवस्था गरेका हौँ’,श्रेष्ठले भने,‘यस्तो व्यवस्थाले उनीहरुमा थप हौसला जगाउन सक्छ ।’केशर रोका, तुलसीपुर अनलाइन
Post a Comment