|
|
|
|
मंसिर २४, काठमाडौं । भारत सीमासँग जोडिएका देशका मुख्य व्यापारिक नाकाहरु आज एकाएक सहज बनेको छ ।
आज दिउँसोसम्ममा विराटनगरको जोगबनी, नेपालगन्जको रुपैडिहा, काँकडभिट्टा–पानीट्यांकी, धनढीको गौरीफन्टा र भैरहवाको सुनौली नाका भएर सहज आपूर्ति हुन थालेका छन् । आज दिउसोसम्ममा विराटनगरको जोगबनी नाका भएर २३ ट्यांकर डिजेल, ८ ट्यांकर पेट्रोल, १४ बुलेट ग्याससहित ७० भन्दा बढी मालबाहक गाडी नेपाल प्रवेश गरेको सीमा प्रहरी कार्यालयले जनाएको छ ।
यस्तै, नेपालगन्जको रुपैडिहा नाकाबाट १९ ट्यांकर डिजेल, ५ ट्यांकर पेट्रोल, ३ ट्यांकर हवाई इन्धन, ७ बुलेट ग्याससहित १ सय ६२ ओटा मालबाहक गाडी नेपाल भित्रिएको जनाइएको छ । त्यस्तै काँकडभिट्टाको पानीट्यांकी नाकाबाट विहीबार दिउँसोसम्म ३ ट्यांकर पेट्रोल, ७ ट्यांकर डिजेल, १ ट्यांकर मट्टीतेलसहित ५९ ओटा मालबाहक गाडी गाडी नेपाल प्रवेश गरेका छन् ।
उता धनगडीको गौरीफन्टा नाका पछिल्लो केहि दिनदेखि सहज बनेको छ । अन्य नाकाहरुका रोकिएका गाडीहरु पनि यो नाकाबाट प्रवेश दिइएको जनाइएको छ भने नेपाल आयल निगमको अनुसार उक्त नाकामा इन्धन सबैभन्दा सहज बनेको छ । निगमले मागेजति इन्धन उक्त नाकाबाट नेपाल भित्रिएका छन् । त्यस्तै भैरहवाको सुनौली नाकाबाट इन्धनका गाडी नभित्रिएपनि अन्य मालबाहक गाडीहरु नेपाल भित्रिएका छन् ।
यसैबीच बाँकेको जमुनाहा नाका पनि सहज बनेको छ । सीमा क्षेत्रमा मधेसी मोर्चाका कार्यकर्ता भए पनि उनीहरुले अघिल्ला दिनमा जस्तो अवरोध पुर्याएका छैनन् । आज २ बजेसम्म यो नाकाबाट ग्यासका बुलेट ७ वटा, डिजल ट्यांकर १९ वटा, पेट्रोल ट्यांकर ५ वटा , हवाई इन्धन बोकेका ३ वटा र अन्य मालबाहक गाडिहरु १५० वटा भित्रिएका छन् ।
जमुनाहा नाका खुकुलो भएपछि बिहीबार मध्यान्हसम्म १५० वटा मालबाहक गाडिहरु भारतबाट नेपाल भित्रिएका छन् । केन्द्रले स्पष्ट निर्देशन नदिएका कारण सीमामा धर्ना दिन गएका मोर्चाका कार्यकर्ताहरु अन्यौलमा रहेकाले नाका खुकुलो पारिएको हो ।
Post a Comment