|
|
|
|
मङ्सिर २३, काठमाडौँ । ‘मन्त्रीका लागि बिहे गर्न केटी चाहियो !’ यत्ति ६ वटा शब्द बोले पुग्छ, केटीको लस्कर टुँडिखेलले धान्दैन ।
तर, नेपाल सरकारका बहालवाला मन्त्रीका लागि दुलही माग्न गएका मान्छेले दुलही त ल्याएनन्, बरु महिलाकी आफन्तका कुरा सुनेर हिस्स पर्दै फर्किएका छन् । अहिलेको सरकारका एक मात्र अविवाहित मन्त्री हुन्, शेरधन राई ।
सूचना तथा सञ्चार प्रविधि मन्त्रालय सम्हालेका ४५ वर्षीय उनी अनुहार र जिउडाल परेका युवा हुन् । अचम्म लाग्दो हो, त्यस्ता हट्टाकट्टा मन्त्रीले दुलही नपाएको कुराले । तर, लमी एक त शेरधनलाई जानकारी नदिई, त्यसमाथि अर्कै पार्टीकी नेत्री हेर्न पुगेका थिए ।
फेरि माग्नु पनि मिल्दोसँग नि, कम्युनिस्ट पार्टी नै भए पनि एमालेसँग कहिल्यै कुरा नमिल्ने नेपाल मजदुर किसान पार्टीकी नेत्री थिइन्, उनीहरूले विवाह गराउन चाहेकी महिला । सोझै उनीसँग होइन, उनका नेतासँग कुरा भयो । ती नेत्री थिइन्, सांसद् अनुराधा थापामगर ।
तर, नेमकिपाका नेताले अनुराधाका अरुसँगै कुरा चलेका कारण आश नगर्न सुझाव दिए । ‘तैपनि’ भन्दै एमाले कुरा कोट्याउन खोज्दै थिए, ‘केको तैपनि ?’ भन्दै नेमकिपाका नेताको हप्की खाएपछि चुप लागेर फर्किए ।
तर, यो घटना शेरधन मन्त्री हुनुभन्दा अघिको हो । दोलखाली सांसद पार्वत गुरुङ, ओखलढुंगे यज्ञराज सुनुवारलगायत साथीले लमी बनेर यस्तो प्रयास गरेका थिए ।
अर्को रमाइलो कुरा त के हो भने, आफ्ना लागि साथीहरू दुलही खोज्दै हिँडेको कुरा मन्त्री बनिसक्दा पनि शेरधनले चाल पाएका रहेनछन् । लमीले नेपकिपाका नेता प्रेम सुवालसँग कुरा गरेका थिए । सुवालले ‘तपाईंहरुले कुरा गर्न ढिला गर्नुभयो । उहाँको अन्तै कुरा चलेको छ’, भने ।
पार्टी विभाजनका बेला भोजपुरका सबैजसो वरिष्ठ नेता एमालेमा लागेपछि अखिलको केन्द्रीय सदस्य छँदै ०५६ सालको आमनिर्वाचनमा शेरधनले सांसद् जिते । त्यसबेला उनी २७ वर्षका लक्का जवान थिए ।
उसैबेला गाउँमा शेरधनको बिहेको कुरा चलेको थियो । तर, पार्टी फुटेर जिल्लामा नेताको खडेरी लागी सांसद् हुनुपर्ने भएपछि बिहेको फुर्सद् भएन । मन बहलाउन र समय काट्नुपरेमा तोङवा तान्दै मादल बजाएर नाच्छन् उनी । -आस्था साप्ताहिकबाट
Post a Comment