|
|
|
|
जिल्लाका विभिन्न स्थानमा निर्माणाधीन एकदर्जन बढी पुलको निर्माण कार्य समयमा सम्पन्न नहुने देखिएको छ । जिल्लामा निर्माणाधीन पुल मात्र नभएर यसपूर्वका पुलहरु पनि ठेकेदार कम्पनीहरुसँग भएको सम्झौता समय भन्दा धेरैपछि मात्र निर्माण सम्पन्न भएको मध्यपश्चिम सडक डिभिजन कार्यालयको तथ्याङ्कले देखाउँछ ।
यही आउँदो असोज मसान्तभित्र निर्माण सम्पन्न गरिसक्ने गरी सम्झौता गरिएका जिल्लाका चारवटा पुलमध्ये दुईवटा पुलको निर्माण कार्य समयमै नसकिने निश्चित भइसकेको छ । जसमध्ये पश्चिम दाङको भमके खोला पुलको मात्र निर्माण कार्य सम्पन्न भएको सडक डिभिजन कार्यालय दाङले जानकारी दिएको छ । कार्यालयका अनुसार जिल्लाको देउखुरीस्थित पिपरी खोलामा निर्माणाधीन पुलको निर्माण कार्य अन्तिम चरणमा रहेको छ । तर, अन्य दुईवटा पुलको निर्माण कार्य २५ प्रतिशत पनि पुरा भएको छैन ।
मध्यपश्चिम सडक डिभिजन कार्यालय दाङका अनुसार लमही–तुलसीपुर सडक खण्डअन्तर्गत कटुवा खोला र पत्रे खोला पुलको निर्माण कार्य कछुवाको गतिमा अगाडि बढेको छ । कटुवा खोला र पत्रे खोलाको पुल निर्माण सम्पन्न गर्ने समय आगामी असोज मसान्तभित्र मात्र रहे पनि त्यो समयमा पुल सम्पन्न हुने अवस्था नरहेको सडक डिभिजन कार्यालय घोराहीले बताएको छ । निर्माण कम्पनीकै लापरबाहीका कारण समयमै योजनाहरु सम्पन्न नहुने गरेको सडक डिभिजन कार्यालयका सूचना अधिकृत ईञ्जिनियर कल्पना अधिकारीले बताउनुभयो ।
एउटा निर्माण कम्पनीले धेरै ठेक्काको जिम्मेवारी लिने र कुनै पनि काम जिम्मेवारी रुपमा सञ्चालन नगर्दा योजनाहरु समय मै सम्पन्न हुन नसकेको सुचना अधिकृत अधिकारीको भनाइ छ । तर, कटुवा खोला र पत्रे खोलाको निर्माण गर्ने जिम्मेवारी पाएको शंकरमाली निर्माण सेवाले भने ईन्धनको अभाव, बन्द हड्ताल र पेट्रोलियम पदार्थहरुको अभावको कारण अहिले सञ्चालनमा रहेका पुलहरुको निर्माणमा समस्या भएको बताएको छ ।
२०७१ साल कार्तिकमा ठेक्का सम्झौता भएको कटुवा र पत्रे खोलाको पुल निर्माण २४ महिनाभित्र सम्पन्न गर्ने योजना रहेको थियो । तर, देशमा देखिएको अस्थिरका कारण समयमै योजनाहरु सम्पन्न गर्ने अवस्था नरहेको पुल निर्माण कम्पनीका पदम शर्माले जानकारी दिनुभयो । पुल निर्माणका लागि आवस्यक पर्ने निर्माण सामग्रीहरुको अभावका कारण १० महिना काम नै रोकिएको उहाँको भनाइ रहेको छ । यी दुई पुलहरु २०७३ सालमा निर्माण सम्पन्न हुने शर्माको भनाइ छ ।
थप ८ वटा पुलको निर्माण सुरु
यसैबीच दाङमा थप ८ वटा पुलको निर्माण कार्य सुरु भइसकेको छ । मध्यपश्चिम सडक डिभिजन कार्यालय घोराही दाङले २० दिन अगाडि आठ वटा पुलको ठेक्का व्यवस्थापन प्रक्रिया सुरु गरेको जनाएको छ । आठ वटा पुलहरुमध्ये केही पुलहरुको सर्भे गर्ने काम पनि सुरु भइसकेको कार्यालयका सुचना अधिकृत ईञ्जिनियर अधिकारीले जानकारी दिनुभयो ।
जिल्लाका बबई, गुर्जे, संग्राम, सेवार, हापुर, सिकारवहा प्रनाहा, करुंगा खोला र बबई (ढिकपुर) मा नयाँ पुल निर्माणका लागि ठेक्का स्वीकृत भएको छ । बबई, गुज्रे, संग्राम, सेवारलगायतका खोलाहरुमा पुलको सर्भे, डिजाइन लगाएका काम सुरु भएको छ, भने सिकारवहा प्रनाहा र बबई ढिकपुर खोलाको पुलको भने काम सुरु हुन सकेको छैन । यी आठ वटा पुल ४ करोडदेखि १७ करोडसम्मको लागतमा काम सुरु गर्न थालिएको छ । यी पुलहरु २४ महिनादेखि ३६ महिना समयभित्र सम्पन्न गर्ने विभिन्न ठेकेदार कम्पनीहरुसँग सम्झौता भएको छ ।
यसैबीच दाङ र सल्यानका विभिन्न ७ वटा पुलहरुका लागि ठेक्का आह्वान गरिएको छ । घट्टे खोला, नेथे खोला, जलुके खोला, हापुर खोलाका दुईवटा, काला खोला र माया खोलामा पुल निर्माणका लागि ठेक्का आह्वान गरिएको छ ।
प्रयोग गर्न थालिएको बालुवा गुणस्तरहीन पुष्टि
केही समय अगाडि कटुवा खोला पुलको निर्माणमा गुणस्तरहीन बालुवा प्रयोग गर्न थालिएको भन्दै नमुनाका रुपमा परिक्षण गर्न ल्याइएको बालुवा गुणस्तरहीन नै भएको पाइएको छ । पुलको निर्माणका लागि बबई खोलाबाट ल्याएको बालुवामा माटो मिसिएको पाइएकाले त्यो बालुवा प्रयोगमा रोक लगाइएको सडक डिभिजन कार्यालयका ईञ्जिनियर कल्पना अधिकारीले जानकारी दिनुभयो ।
पुलको निर्माणमा प्रयोगका लागि बालुवा ल्याइएको भए पनि जिल्लाका सरोकारवाला निकायहरुको पहलमा सम्बन्धित निकायहरुको ध्यानाकर्षण गराई उक्त बालुवा प्रयोगमा रोक लगाइएको थियो । आफूहरुको निरन्तर निगरानी भएकाले स्टिमेट अनुसार नै निर्माण सामग्रीहरुको प्रयोगमा कडाई गरिने सुचना अधिकृत अधिकारीले जानकारी दिनुभयो । दाङखबरबाट साभार
Post a Comment