|
|
दाङ फागुन १४ । एकीकृत नेकपा माओवादीका स्थायी कमिटी सदस्य जनाद्र्धन शर्मा प्रभाकरले प्रस्तावित पाँच नम्वर प्रदेशको राजधानी दाङ नै हुने बताउनुभएको छ । क्रान्तिकारी पत्रकारंघ दाङले आज घोराहीमा आयोजना गरेको पत्रकार सम्मेलनमा बोल्दै प्रभाकरले राजधानीका लागि हरेक हिसावले दाङ नै उपयुक्त भएकाले दाङलाई नै राजधानी बनाउनुपर्ने बताउनुभएको छ ।
भौगोलिक, आर्थिक र सुरक्षाका दृष्टिले दाङ नै राजधानीका लागि उपयुक्त भएको भन्दै प्रभाकरले प्रदेशनम्वर ५ को सीमाङ्कनमा हेरफेर नहुँदासम्म दाङ राजधानी बन्न नसक्ने बताउनुभयो । पहिलो प्रादेशीक सभाले प्रदेशको नामाकरण र राजधानी तोक्ने प्रावधान रहेको भन्दै नेता प्रभाकरले वर्तमान संरचनामा दाङलाई राजधानी बनाउनुपर्छ भन्ने पक्ष अल्पमतमा रहने हुँदा दाङलाई राजधानी बनाउन ५ नम्वर प्रदेशको सीमाना बढाउनुपर्ने बताउनुभयो ।
‘दाङ राजधानीका लागि उपयुक्त छ । यो कसैले पनि नकार्न सक्दैन । पहिलो प्रादेशीक सभाले राजधानी तोक्ने हुँदा दाङलाई राजधानी बनाउनुपर्छ भन्ने पक्ष अल्पमतमा पर्ने अवस्था देखिन्छ’, प्रभाकरले भन्नुभयो, ‘थारुहरुको मागलाई सम्बोधन गर्दै प्रदेशनम्वर ५ को सीमाना कैलालीसम्म पुर्याउनुपर्छ र राप्ती लुम्बीनीका पहाडलाई ५ नम्बरबाट अलग्याउनुपर्छ । यसो गरियो भने दाङलाई राजधानी बन्नबाट कसैले रोक्न सक्दैन ।’
अर्को प्रसंगमा बोल्दै नेता प्रभाकरले अबको एक दशक आर्थिक सम्बृद्धिका लागि संघर्ष गर्नुपर्ने बताउनुभयो । लामो संघर्षपछि नेपाली जनताहरुले संविधान पाएको भन्दै उहाँले अब मुलुकलाई सम्बृद्ध बनाउन संघर्ष गर्नुपर्ने बताउनुभयो । मधेशीहरुको आन्दोलनलाई राष्ट्रबिरोधीको संज्ञा दिँदै प्रभाकरले मधेशीहरुलाई संविधानले अधिकार सम्पन्न बनाइसकेको बताउनुभयो । संघका अध्यक्ष डिल्ली मल्लको अध्यक्षतामा भएको पत्रकार सम्मेलनको सहजीकरण सचिव पाण्डवप्रसाद शर्माले गर्नुभएको थियो । dangkhabarबाट साभार
Post a Comment