|
|
|
|
रोल्पाबाट भक्तपुरका इँटाभट्टामा पुर्याइएकी मसिनाकी १४ वर्षीया भूमिका घर्तीमगर, जोलीपोखरीका १४ वर्षीय गोवद्र्धन विक र १२ वर्षीय नवीन बोहराका साथै फगामकी १३ वर्षीया टेक मालालाई बाल विकास समाजको पहलमा उद्धार गरिएको हो ।
उनीहरूलाई अभिभावकको जिम्मा लगाइएको छ । संस्थाका अनुसार श्रमका लागि राजधानी उपत्यकाभित्रका इँटाभट्टामा लगिएका दर्जनौं बालबालिकामध्ये कतिपयलाई आफ्नै अभिभावकले लगेका थिए भने कतिपयलाई श्रमको व्यापारमा संलग्न ‘नाइके’ ले फकाई फुल्याई पुर्याएका थिए ।
विद्यालयमा पढदापढदै राजधानीका श्रम बजारमा लगिएका आफ्ना सन्तानलाई संस्थाले खोजी गरेर घर फर्कादिएकामा अभिभावक निकै खुसी भएका छन् । ‘मेरो छोरोलाई घर फिर्ता गरिदिएकामा हामी खुसी छौं । उसलाई विद्यालयमा पढन पठाउँछु ।’ गोवद्र्धनका पिता तिलकले भने, ‘आर्थिक अवस्था कमजोर भएकाले ऊ घरबाट भागेको हो । अब आफ्नै जोहो गरेर स्कुल पठाउँछु ।’
इँटाभट्टाबाट फिर्ता गरिएका बालबालिकालाई पुन: विद्यालय पठाउन बाल विकास समाजले प्रतिविद्यार्थीलाई २० हजार नगद प्रदान गरेको छ । स्थानीय मानव अधिकार सचेतना केन्द्र (हुरेक) को समन्वयमा उक्त रकम प्रदान गरिएको हो ।
सेभ द चिल्ड्रेनले पनि ती बालबालिकालाई सहयोग गर्ने वचन दिएको छ । सेभ द चिल्ड्रेनका जिल्ला कार्यक्रम संयोजक इन्द्र बडुवाल भन्छन्, ‘श्रम बजारबाट घर ल्याइएका बालबालिकालाई आर्थिक सहयोग खाँचो परेमा हामी सहयोग गर्छौं ।’ -काशिराम डाँगी, इकान्तिपुरबाट साभार
Post a Comment