|
|
|
|
सन्तोषकुमार गुप्ता/जेठ २६, दाङ । मालिका–कालिका यातायात प्रालिले यातायात क्षेत्रमा सिन्डिकेट चाहनेहरुका कारण आफ्ना ब्यवसायीले दुःख पाएको उल्लेख गरेको छ । प्रालिका अध्यक्ष सुमन पोख्रेलले मंगलवार एक बिज्ञप्ति प्रकाशित गरी सिन्डिकेट चाहने यातायात समितिको आर्थिक प्रलोभनमा परेर यातायात व्यवस्था बिभागले प्रालिलाई दुःख उल्लेख गरेका छन् ।
सिन्डिकेटका पक्षधर यातायात समितिको प्रभावमा परी बिभागका महानिर्देशक चन्द्रमान श्रेष्ठको पहलमा प्रालि सम्बन्धी नियम २१ दिनमा तीन पटक संशोधन गरेर आफूहरुको ब्यवसाय धरापमा पार्ने काम गरेको आरोप लगाइएको छ । विज्ञप्तिमा मालपोत कार्यालय बाट करारनामा गर्नुपर्ने महानिर्देशक श्रेष्ठको परिपत्रका कारण प्रालिका बसका कागजपत्र बन्न ढिला भएको उल्लेख छ ।
बिभागको परिपत्र अनुसार करारनामा गर्न मालपोत कार्यालय गएको र मालपोतले बसको करारनामा गर्ने अधिकार नभएको भन्दै फर्काएकाले यातायात बिभागको परिपत्र गैरकानुनी भएको विज्ञप्तिमा दावी गरिएको छ ।
यसैवीच प्रालिले राप्ती अञ्चल सार्वजनिक यातायात व्यवसायी समितिका जिम्मेवार व्यक्तिले मालिका कालिका यातायात प्रालिको सेवा बन्द भएको भन्दै सामाजिक सञ्जालमा मार्फत गलत प्रचार गरेकोमा आपत्ति जनाएको छ ।
विज्ञप्तिमा यसअघि कानुनी प्रक्रिया पुरा भइसकेका गाडि निरन्तर सञ्चालन भइरहेको र बाँकी गाडीको पनि कागजी प्रकृया पुरा गर्न आफूहरु लागिरहेको भन्दै प्रालिका गाडी बन्द भनि फैलाइएको भ्रममा नपर्न आग्रह गरिएको छ । विज्ञप्तिमा असार १४ गतेदेखि दाङका स्थानीय रूट, बिराटनगर, विरगञ्ज, पोखरा नेपालगन्ज लगाएतका ठाउँमा ३३ सिट क्षमता भएका डिलक्स बस सञ्चालन गर्ने उल्लेख छ । साझासबाल अनलाइनबाट
Post a Comment