|
|
वर्षातमा आएर बल्ल दाङका पुलहरुको निर्माण कार्य सुरु हुने गरेको छ । सडक नै अवरुद्ध हुने गरी पुलहरुको केहि वर्षदेखि निर्माण कार्य सुरु गरिएको हो । तर, निर्माणको काम रोकिदै र फेरि सुरु हँुदै गरेको छ । जस्का कारण प्रत्येक वर्षातको मौसममा सवारीका साधनहरु र यात्रुहरुलाई समस्या हुँदै आएको छ ।
घोराही–लमही सडक खण्डको कटुवा खोला पुल बिगत तीन वर्षदेखि निर्माणका काम सुरु गरिएको थियो । तर, अहिले निर्माण कार्य २५ प्रतिशत पनि सकिएको छैन । जसका कारण बाटो भत्काएर निर्माण थालिएको पुलको काम हिउँदमा रोकिने र वर्षातमा आएर मात्र सुरु हुने गरेको छ । विकल्पका रुपमा नजिकै तयार पारिएको डाइभर्सनले अन्य मौसममा त सताएको थियो नै वर्षातमा झन् दुःख दिएको छ । कटुवा खोलामा बढेको भेलले डाइभर्सन कटान गर्दा मोटरसाइल बाहेक ठुला सवारी साधन तथा मालबाहक गाडीहरु चल्न नसक्ने भएको छ । तर, सामान्य रुपमा मर्मत गर्दै जोखिम मोलेर भएर पनि सवारी चलाउने गरेको चालकहरुले बताएका छन् ।
स्थानीय रुट अनुसार चल्ने ट्याक्सी, म्याजिक बस, कारलगायतका साना साधनहरु घोराही–डवरी हँुदै चल्ने गरेको म्याजिक गाडी चालक शोभाखर भुसालले बताउनुभयो । त्यो सडक पनि हिलाम्मे र साँघुरो हँुदा यात्रा गर्न समस्या रहेको यात्रुहरुले बताएका छन् । दोहोरो गाडीहरु सञ्चालन हुन नसक्दा सडकमा जाम हुने गरेको छ, भने सडक नै बिग्रने गरेको त्यहाँका स्थानीयहरुले बताएका छन् । त्यतिमात्र होइन बिकल्पका रुपमा प्रयोग गरिएको त्यो सडकबाट यात्रु बोकेबाफत साना साधनहरुले थप भाडा असुल्ने गरेको यात्रुहरुको गुनासो रहेको छ ।
त्यस्तै सोही सडक खण्डको बबई नदीमा पनि पुल निर्माण कार्य भर्खरै सुरु भएको छ । पुल निर्माणका लागि सडकमै ठूला खाल्टा खनेर छेउबाट सवारी चल्ने बैकल्पिक कच्ची मार्ग बनाइएको छ । अर्कोतिर प्रतिकुल मौसममा पुल निर्माणको काम सुस्त गतिमा बढेको छ । यस्तै घोराही तुलसीपुर सडक खण्डअन्तर्गत पत्रे खोला, संग्राम खोलालगाएतका केहि स्थानमा पुलको काम चलिरहेको छ, भने डाइभर्सन निर्माण गरेर काम चलाउने प्रयास गर्दा खोलामा बाढी आउँदा समस्या थपिएको छ ।
पुल निर्माणका लागि आवस्यक पर्ने ईन्धन यो वर्ष अभाव रहेको बन्द हड्तालका कारण निर्माणको काम अगाडि बढ्न नसकेको कटुवा खोला र पत्रे खोलाको निर्माण गर्ने जिम्मेवारी पाएको शंकरमाली निर्माण सेवाले बताएको छ । ‘तपाईहरुलाई थाहा छ, यो वर्ष लामो बन्द हड्ताल भयो, बन्द मात्र हैन ईन्धनको चरम अभाव भयो । यस्तो अवस्थामा कसरी काम गर्न सकिन्छ ?’ कम्पनीका पदम शर्माले भन्नुभयो, ‘ढुंगा गिट्टी बालुवा पनि यहि समयमा आएर मात्र पाइन्छ । काम गर्न निक्कै समस्या छ ।’
२०७१ साल कार्तिकमा ठेक्का सम्झौता भएको कटुवा र पत्रे खोलाको पुल निर्माण २४ महिनाभित्र सम्पन्न गर्ने योजना रहेको थियो । यी पुलहरु आगामी असोज महिनाभित्र सम्पन्न गरिसक्नुपर्ने समयावधी छ । तर, पुल निर्माणका लागि आवस्यक पर्ने निर्माण सामग्रीहरुको अभावका कारण १० महिना काम नै रोकिएकाले यी दुई पुलहरु आगामी आर्थिक वर्ष मात्र सम्पन्न हुने शर्माको भनाइ छ ।
सरोकारवाला निकाय मौन
सम्झौता भएको लामो समयसम्म पनि पुलहरुको निर्माण कार्य सम्पन्न नहुने र सर्वसाधारणहरुले दुःख पाइरहदा पनि स्थानीय सरोकारवाला निकायहरुले कुनै चासो दिएका छैनन् । जिल्लाको भौतिक विकासमा जनचासो घट्दै गएको छ, भने सरोकारवाला निकायहरु समेत कुनै चासो नदिएको पाइएको छ । तर, नागरिक समाज दाङका सचिव चन्द्रराज पन्तले सडक डिभिजन कार्यालयलाई पटक–पटक ध्यानाकर्षण गराउँदै आएको बताउनु भयो । ‘हामीले भन्ने सडक डिभिजनलाई हो । डिभिजनले विभिन्न आलटाल गरेको छ’, सचिव पन्तले भन्नुभयो, ‘सबैले आआफ्नो जिम्मेवारी बहन गर्नुपर्छ भनेर हामीले भन्दै आएका छौं ।’ विभिन्न कार्यक्रमहरुमा यो सवालको उठान गरिरहेको उहाँको भनाइ रहेको छ ।
जनतालाई दुःख दिने मनसाय देखिएको भन्दै यो लापरबाहीको अन्त्य हुनुपर्ने उहाँको भनाइ रहेको छ । जिल्ला विकास समितिको सार्वजनिक सुनुवाई कार्यक्रममा पनि यो विषयलाई कडाईका साथ उठाइएको छ । सर्वसाधारणहरुको दैनिक जीवनसँग जोडिएका भौतिक संरचना निर्माणका लागि जिम्मेवार निकायहरुले आलटाल गर्न नहुने सचिव पन्तले बताउनुभयो ।
निर्माण व्यवसायी संघले अनुगमन गर्ने
यता दाङ निर्माण व्यवसायी संघले जिल्लाका विभिन्न स्थानमा निर्माण सुरु गरिएको पुलहरुको अनुगमन गर्ने भएको छ । जिल्लामा निर्माण थालिएका पुलहरुको बारेमा व्यापक जनगुनासो आएपछि संघका पदाधिकारीहरुको नेतृत्वमा आज अनुगमन गरिने संघका सचिव दोर्ण बहकारीले जानकारी दिनुभयो ।
अध्यक्षको निर्देशनमा आज संघका बरिष्ठ उपाध्यक्ष गणेश गिरी, प्रथम उपाध्यक्ष गोपाल घिमिरे, महासचिव शोकबहादुर रोकालगायतले पुल निर्माणको कामलगायत अन्य ठेक्का प्रक्रिया र उपभोक्ता समितिले गरेका कामहरुको बारेमा पनि अनुगमन गरिने सचिव बहकरीले जानकारी दिनुभयो । केहि व्यक्तिहरुका कारणले सिंगो निर्माण व्यवसायीहरुको बदनाम भएको भन्दै अनुगमन गर्न थालेको संघले जनाएको छ । -समाचार गणतन्त्र दैनिकमा छापिएको छ ।
Post a Comment