|
|
पुस ११, काठमाडौँ । विराटनगरको सीमावर्ती जोगबनी नाकामा प्रहरी र मधेसी मोर्चाका कार्यकर्ताबीच झडप भएको छ । सीमा नाकामा अवरोध गर्न बसेका मधेसी मोर्चाका नेता राजेन्द्र महतोलाई धर्नामा बस्नबाट प्रहरीले रोक्न खोज्दा झडप भएको हो ।
महतोसहितका नेता कार्यकर्ता भारतीय भूमिबाट प्रवेश गरी भन्सार कार्यालयनजिक दशगजा क्षेत्रमा धर्नामा बसेका थिए । त्यसक्रममा प्रहरीले उनीहरुलाई हटाउन खोजेको थियो । भन्सार नाकाभन्दा केही उत्तर रानी क्षेत्रको बसपार्कमा सभा गर्ने भनिएको थियो ।
तर भारतीय क्षेत्रबाट प्रवेश गरेका महतोसहितका नेता कार्यकर्ता दशगजामा धर्ना बस्न खोजेको मोरङका प्रहरी उपरीक्षक तारिणीप्रसाद लम्सालले बताए । प्रहरीको लाठी प्रहारले घाइते भएकाले महतो उपचार गर्न भारततिर गएको दाबी मोर्चाले गरेको छ ।
त्यसक्रममा प्रहरी र भन्सार कार्यालयको गेटनजिकको कार्यालयमा मोर्चाका कार्यकर्ताले ढुंगा प्रहार गरेको उनले बताए । त्यसपछि प्रहरीले पनि लाठी प्रहार र अश्रुग्यास प्रयोग गरेको थियो । झडपको घटनापछि महतोसहितका नेता कार्यकर्ता नाका छिचोल्दै भारतीय भूमितिर गएको लम्सालले बताए ।
मोर्चाका कार्यकर्ताले भारतीय क्षेत्रबाट नेपाली प्रहरी टोलीलाई ढुंगा प्रहार गरेका थिए । झडपमा आफ्ना केही कार्यकर्ता घाइते भएको मोर्चाले जनाएको छ ।
सद्भावना पार्टीका केन्द्रीय प्रवक्ता सन्तोष मेहताका अनुसार प्रहरीले धर्नामा बसेका बेला हस्तक्षेप गरेको थियो । त्यसक्रममा एक्कासी लाठी प्रहार गरेको उनले दाबी गरे । लाठी प्रहारबाट अध्यक्ष महतो, केन्द्रीय सदस्य दिलिप धाडेवा र आफूसहितका नेता कार्यकर्ता घाइते भएको सन्तोषले बताए ।
मोर्चासँग सहकार्यमा रहेको आदिवासी जनजाति मञ्चका महासचिव तेन्जिङ लामाका अनुसार प्रहरीको लाठीचार्जले घाइते भएका कार्यकर्ताहरु भारततर्फको जोगबनीतर्फ गएको बताए ।
झडपका कारण नाका क्षेत्रमा तनाव भएको छ । त्यहाँबाट सर्वसाधारणको आउजाउ समेत प्रभावित भएको छ । ekantipur.comबाट साभार
Post a Comment