|
|
चिसोले शिविरमै बेहोस
धादिङ : पुस लागेपछि धन्सारपाखा शिविरमा चिसोले चार जना बेहोस भए । पीडित भन्छन्, ‘जस्ताको छानाबाट शीत चुहिएर ओछ्यान भिज्छ, पातलो प्लास्टिकको बारले चिसो छेकिँदैन । मध्य चिसोमा पनि कपडा किन्न सरकारको १० हजार राहत पाइएन ।’
महिलाको मृत्यु, सुत्केरी बेहोस
काभ्रे : २ पुसमा च्यासिङखर्ककी कान्छीमाया तामाङको चिसोले कठ्यांग्रिएर मृत्यु भयो । चिसोले बेहोस १० महिनाकी सुत्केरी ऋण लिएर उपचार गर्दै छिन् । भूकम्पपीडित ज्ञानबहादुर ब्लोन भन्छन्, ‘जस्ताको टहरो छ, माथिबाट शीतको झरी पर्छ, भुइँबाट चिसो आउाछ । सबैतिर चिसो नै चिसो छ ।’
बालबालिका र वृद्धवृद्धामा निमोनिया
रसुवा : पालमुनि बस्दै आएका सुत्केरी, बालबालिका, वृद्धवृद्धामा निमोनियालगायतका रोग देखिन थालेको छ । धुन्चे, बोगटीटार, गुम्बुडाँडालगायतका ठाउामा भूकम्पपीडित छन् । तर, अस्थायी टहरामा कति छन् भन्ने तथ्यांक प्रशासनसाग छैन । न्यानोका लागि सहयोग नपाएको अधिकांशको गुनासो छ ।
चिसो हावासँगै ओछ्यानमै शीत
गोरखा : चिसो सुरु भए पनि टहरोको वासमा पूरै रात सुत्न कठिन भएको गोरखा नगरपालिका पस्लाङकी बेलमाया थापाले बताइन्, ‘टहरो भाटाले बारेकी छु, छ्याङ–छ्याङ देखिन्छ, हावाले बेलुकी सुत्न सकिन्न, राति ३ बजे ओछ्यानमा शीत तरर चुहिएर रुजाउँछ । ओड्ने पनि गतिलो नहुँदा विजोग भएको छ ।’ चिसोले बालबालिका र वृद्धवृद्धा बढी पीडित भएका छन् ।
भूकम्पपीडितका नाममा आएका कपडा सरकारी गोदाममा थन्किए
भूकम्पपीडित न्यानो कपडाको अभावमा ज्यान गुमाइरहेका छन् । तर, तिनै पीडितलाई दिन बंगलादेशसहित अरू दाताबाट उपलब्ध भएको पाँच ट्रक कम्बल झापाको काँकडभिट्टास्थित मेची भन्सार कार्यालयको गोदाममा ताला लगाएर राखिएको छ । आजको नयाँ पत्रिका दैनिकमा खबर छ ।
Post a Comment