दाङमा अस्ट्रिज पालन व्यवसाय सफल बन्दै, मासिक एक लाख बढी आम्दानी

दाङ फागुन २८ । दाङमा अष्ट्रिजपालन व्यवसाय सफल हुँदै गइरहेको छ । २ वर्ष अघिदेखि दाङको बिजौरीमा सुरु गरिएको अस्ट्रिजपालन व्यवसाय सफल हुँदै गएको जाँदा मासिक १ लाख बढी आम्दानी भइरहेको अस्ट्रिज नेपालका व्यवस्थापक वसन्त ओलीले जानकारी दिनुभयो ।

नेपाल संस्कृत विश्वविद्यालय बेलझुण्डीको ५५ बिगाह जग्गा भाडामा लिई सुरु गरिएको अष्ट्रिज फर्ममा ६ सय ५० अस्ट्रिज रहेको भन्दै व्यवस्थापक वलीले यसलाई बढाउँदै लैजाने बताउनुभयो । विश्वको सबैभन्दा अग्लो पंछि मानिने अस्ट्रिजको अण्डा, मासु र प्वाक बिक्री हुने अलीको भनाइ छ ।

मासु प्रतिकिलो १ हजार ५ सय र अण्डा प्रतिगोटा २ हजार रुपैयाँका दरले बिक्रि गर्दै आएको व्यवस्थापक वलीले बताउनुभयो । ‘अस्ट्रिजपालन व्यवसाय सुरु गर्दा लगानी डुब्छ कि भन्ने डर लागेको थियो । तर, २ वर्षमै राम्रो आम्दानी भइरहेको छ’, ओलीले भन्नुभयो, ‘दाङमा अस्ट्रिजको मासु र अण्डाको माग न्यून भए पनि दाङ बाहिरका बजारहरुबाट अत्यधिक माग आइरहेको छ ।’

मासु जुनसुकै समयमा पनि बिक्री हुने गरे पनि अण्डा भने मंसिरदेखि असारसम्म मात्रै बिक्री हुने ओलीले बताउनुभयो । सुरुमा बच्चालाई हुर्काउन अप्ठ्यारो हुने भए पनि हुर्किसकेपछि कुनै पनि रोगले आक्रमण नगर्ने हुँदा लगानी सुरक्षित हुने व्यवस्थापक ओलीको भनाइ छ । फर्ममा दैनिक २० वटासम्म अण्डा उत्पादन हुने र सातामा २ पटक रुपन्देहीस्थित ह्याचरीमा बिक्रीका लागि पठाउने गरिएको उहाँले बताउनुभयो ।

‘कुखुराजस्तो अस्ट्रिजलाई रोग लाग्दैन । बेलाबेलामा भाले भालेको जुधाईले मर्न सक्छन्, तारजलीमा अड्किएर वा कुनै दुर्घटनामा परि मर्न सक्छन्’, उहाँले बताउनुभयो, ‘अस्ट्रिज ८ फिटसम्म अग्लो हुन्छन्, भाले २ सय ५० किलोग्राम र पोथी २ सय २५ किलोसम्म हुन्छन् ।’ ६० प्रतिशत सागपात र ४० प्रतिशत अन्न, नुन, तेललगायतका बस्तुलाई मिसाई चारो खुवाउँदै आएको व्यवस्थापक ओलीको भनाइ छ ।

एक करोड बढिको लगानीमा सुरु गरिएको अस्ट्रिज फम अवलोकन स्थलका रुपमा पनि विकसित हुँदै गइरहेको छ । सबैको चासोको विषय मानिएको अस्ट्रिज हेर्नका लागि दाङका साथै यस आसपासका क्षेत्रबाट मानिसहरु आउने गरेको जनाइएको छ । अस्ट्रिज फम प्रवेशका लागि प्रतिव्यक्ति १ सय रुपैयाँ शूल्क निर्धारण गरिए पनि विद्यार्थीहरुलाई ५० प्रतिशत छुट दिइदै आएको व्यवस्थापक ओलीले जानकारी दिनुभयो । ‘दाङ मात्रै होइन, मध्यपश्चिमका विभिन्न जिल्लाका साथै सुदूरपश्चिमका कैलाली, कञ्चनपुरसम्मका विद्यार्थीहरु अस्ट्रिज हेर्न आउनुहुन्छ’, व्यवस्थापक ओलीले भन्नुभयो, ‘प्रवेश शूल्कबाट दैनिक १ हजार रुपैयाँ आम्दानी भइरहेको छ ।’ -dangkhabarबाट साभार 

Disclaimer: Please note, this is only video embeding web Page. All of these videos found here from 3rd party video hosting sites such as YouTube.Com, Vimeo.Com, DailyMotion.Com, Blip.Tv, We do not host any videos. Please contact to appropriate video hosting site for any video removal.Please keep watching Hot Video News..