|
|
भारतका सीमावर्ती अधिकारीहरुले मधेसी मोर्चाका कार्यकर्तालाई आफ्नो भूमि र दसगजामा धर्ना र नाकाबन्दी गर्र्न नदिएपछि सुनौली नाकाबाट सोमबार दिउँसो इन्धनसहित करिब पौने पाँचसय गाडी नेपाल भित्रिएका हुन् ।
नेपाली संसदमा संविधान संशोधन विधेयक दर्ताभएसँगै सीमावर्ती भारतीय अधिकारीहरुले नाकामा रोकिएका मालवाहक ट्रक, इन्धन ट्यांकर र ग्यास बुलेटहरु सोमबारदेखि शीघ्ररुपमा पठाउन थालेका हुन् ।
सोमबार दिनभरीमा ५ वटा डिजेल ट्यांकर, ट्रक २०८ वटा मालवाहक, २१४ वटा अन्य, ३२ वटा बस र १७ वटा पिकअप गाडीसहित ४६६ वटा सवारी साधन नेपाल भित्रिएको बेलहिया नाकाका प्रहरीले जनाएको छ ।
निर्वाधरुपमा गाडी चल्न पाएमा रातिसम्म एकहजार गाडी नेपाल भित्रिने भन्सार किलिएरिङ प्रतिनिधी तथा सीमावर्ती सुरक्षाकर्मीले जानकारी दिए ।
संसदमा संविधान संशोधन विधेयक दर्ता भई छलफलको कार्यसूची सार्वजनिक भएको तथा संघीय प्रदेशको सीमांकन पनि तीन महिनामा टुंगाउने गरी वार्ता अघि बढेपछि भारतीय अधिकारीहरुले विनाअवरोध गाडी पठाउन थालेका हुन् ।
एक महिना अघिदेखि नाकामा रोकिएका गाडीहरुलाई भारतीय अधिकारीहरुले शीघ्ररुपमा नेपाल पठाउन थालेको बेलहिया नाकाका प्रहरी निरीक्षक अभयविक्रम शाहले बताए । नाका धेरै खुकुलो एवं सहज बनेकोमा उनले खुशी व्यक्त गरे ।
शनिवारसम्म सुनौली नाकाबाट कोटा सिस्टममा सयवटाको हाराहारीमा गाडीहरु नेपाल प्रवेश पाउँदै आएका थिए । आइतबार भने १० बुलेट ग्यास र २८७ वटा मालवाहक ट्रकसहित ३०५ वटा सवारी साधन नेपाल भित्रिएका थिए ।
सुनौलीका भारतीय प्रहरी चौकी ईन्चार्ज भरत यादवले गाडीहरुको जाम हटेको र लाईन सेटिङ मिलेकाले फटाफट धेरै गाडीहरु पास भएको बताए ।
संविधान संशोधन र मोर्चाको आन्दोलन नेपालीको आन्तरिक कुरा भएको हो । ‘त्यस विषयमा हाम्रो केहि कुरा छैन जसरीपनि नेपालमा शान्ति होस् ।’ उनले भने । ‘अहिले संशोधन दर्ता हुनु र अर्कोतर्फ धेरै गाडीहरु पास हुनु संयोग मात्रै हो ।’
सुनौली व्यापार मण्डलका सदस्य अनिल बनियाले महिनौदेखि दोकान छेकेका गाडीहरु फटाफट चलेकाले व्यापारीमा खुशी जागेको र पसलहरु पनि उज्यालो देखिन थालेको बताए ।
सामान्य अवस्थामा यस नाकाबाट दैनिक ५३ वटा इन्धन तथा ग्यासका वुलेटहरु, ६ सय मालवाहक ट्रक तथा अन्य र बससहित आठ सयजति सवारी साधनहरु प्रवेश गर्दथे ।
प्रमुख जिल्ला अधिकारी विष्णुप्रसाद ढकालले भारतीय अधिकारीले आफूसँग कुरा भएअनुसार शिघ्ररुपमा गाडी पठाउन थालेकोमा खुशी व्यक्त गरे ।
यसैगरी सधैं निर्वाधरुपमा नाकाबाट सहजताका साथ मालवहाक गाडी र इन्धनका ट्यांकर तथा बुलेटहरु पठाइदिन सीमावर्ती अधिकारीसँग पुुनः आग्रह एवम् विश्वास व्यक्त गरेको प्रजिअ ढकालले बताए । कृष्णप्रसाद ढकाल, अन्नपुर्ण पोस्ट अनलाइनबाट
Post a Comment